Recordando a Luís Sepúlveda cola novela Un viejo que leía novelas de amor
L'escritor Luis Sepúlveda dexónos el pasáu xueves como consecuencia del coronavirus. L'escritor, guionista y director de cine chilenu taba afincáu en Xixón dende 1997.
Autor de más d'una ventena de noveles, llibros de viaxe, guiones y ensayos, llogró en 1989 el Premiu Tigre Juan por "Un viejo que leía novelas de amor" y el Premiu Primavera de Novela nel 2009 por "La sombra de lo que fuimos".
Luis Sepúlveda percorrió dende bien xoven casi tolos territorios posibles de la xeografía y les utopíes, y d' esa vida inquieta surdieron hestories, apasionantes relatos y noveles. En 1993 Tusquets Editores empezó la publicación de la so obra cola novela "Un viejo que leía novelas de amor" , traducida a numberosos idiomes, con ventes millonaries y llevada al cine con guion del propiu Sepúlveda, dirección de Rolf de Heer y con Richard Dreyfuss como protagonista.
Siguiéron-y : "Mundo del fin del mundo" , una obra ente la investigación y la denuncia; "Nombre de torero", la so particular novela negra; "Patagonia Express", un prestosu llibru de viaxes; los volumes de relatos: "Desencuentros" , "Diario de un killer sentimental ", seguío de "Yacaré" y "La lámpara de Aladino".
La so novela más recién, "El fin de la historia" , significó la torna de Sepúlveda al protagonista de Nombre de torero, Juan Belmonte. Con "Historia de una gaviota y del gato que le enseñó a volar", Sepúlveda convirtióse nun clásicu vivu pa munchos mozos y escolares; nesa mesma tradición, Tusquets Editores publicó les sos fábules con animales "Historia de un perro llamado Leal ", "Historia de un caracol que descubrió la importancia de la lentitud" e "Historia de una ballena blanca" . Taba acabante presentar "Historia de Mix, de Max y de Mex", una fábula d'amor polos animales, cola amistá ente un mozu y el so gatu como protagonista.
Calcando na semeya d'abaxo puedes ver la peli "Un viejo que leía novelas de amor".
